對於一個為食嘅小朋友，食粥又真係唔係一件太大嘅事...但呢位小朋友又的確係有D性格，嚮屋企都係睇心情先食粥，兼且有D嘴刁！
話說第一次嚮街食粥就喺東涌（原本諗住去大澳，但最後見到巴士條龍就放棄咗），小朋友喊到七彩！又抱又tum又唱歌又行來行去，總之羹粥一放入口就喪喊！（比著馬媽話事就比奶啦，但嫲嫲唔比囉，係餓死都唔比囉）
事後檢討：新匙羹？新環境？粥太熱？（NOTE:我哋無懷疑過食物味道！）
好喇，即日返到屋企再試，用平日匙羹，嚮屋企，姐姐整熱等於同平日一樣，照樣喪喊！媽媽定唔順，唔可以做兩餐飢民，決定唔理嫲嫲開奶！
事後再檢討：粥有魚，可能腥？
晚上同嫲嫲講（已經唔係我，係爸爸開聲講），嫲嫲即刻好堅定咁話無可能，佢之前食過魚粥，肯定係第二D原因！（當然，貫徹佢一向嘅作風，任何statement都係無解釋嘅，但就一定要跟住做） 好喇，佢話唔係就唔係，跟住嘅weekdays小朋友每日都只係肯食一餐粥，第二餐一定喪喊。喊到嫲嫲20萬個不願都開咗奶（小朋友，比個叻你！！）事原嫲嫲非常反對補奶，真係見過小朋友細半碗粥都食唔到就由得小朋友喊住嗌餓到3個鐘後先食下餐。媽媽實在睇唔過眼小朋友要飢饉3小時所以硬住頭皮whatsapp嫲嫲求佢唔好要小朋友節食，唔補奶都要食多少少粥。當然，嫲嫲好唔高興，但小朋友真係唔需要減肥啦！
第二個weekend，送婆婆去機場，喺機場再食粥。除喪喊之外今次有新招-打粥壺！半壺粥跌咗落地，結果食得一半無得再食。媽媽都算狠心，見都食咗一半就無再比奶。（哪，媽媽係講道理的，唔係盲目補奶，但唔飽就真係要補！不能盲目唔補奶！）註：今次係菜粥
事後檢討：新匙羹（姐姐唔記得帶羹）？新環境？或者出街真係食唔到粥。。。
星期日，爸爸媽媽打不死精神發力啦-再試！！今次去咗西貢，all day breakfast嘅餐廳。大成功！！！
今次有咩唔同？自己坐high chair（之前喺抱嘅），粥係南瓜粥，自己匙羹，粥係煲熱唔係蒸熱，餐廳細啲無咁多人同埋有塊大鏡望，有好多檯小朋友。
邊樣work?唔知。最好笑喺，夜晚同嫲嫲講返，佢自動報案話呢隻味嘅粥小朋友鐘意多D!!!!!!我當時真係好想講，一做話咗魚粥味道佢唔鐘意又死唔認！！
睇吓下次出街食又有咩驚喜啦，下星期要去生日會！:)
1 comment:
this is too funny hahah
Post a Comment