星期一
老細稱為"開心日" - 因為分花紅嘛 :) 咁都真係幾開心嘅﹐哈哈﹐我可以免強話儲到我果份嘅首期... 不過要扣返d比爸爸.... 你話啦﹐隔黎team份工邊會夠呢份多﹐唔好晒口水洗我腦啦﹐無用架~~ 收到花紅先做review... 可想而知佢哋有幾重視呢樣嘢... 我話要份copy佢竟然話從來無人問過﹐唔知得唔得.... 乜真係唔係咁緊要咩? 你唔想知自己每年有咩改變咩? 淨係有花紅就得?
今日媽媽返黎﹐唔使接機﹐返而要OT.... 但係結果﹐我好夜先返到屋企媽都係我訓咗先入屋....
星期二
同高妹lunch date﹐多謝你聽我講﹐其實我真係好多嘢擔心.. 多謝你比信心我﹐希望承你貴言啦~! 仲有要恭喜你份新工﹐雖然我哋都唔係見得多﹐但係你知你係我心中嘅地位﹐我真係會好唔捨得﹐好掛住你 :) 祝你事事順利﹐同老公開開心心啦~ 今日當然要早放工﹐約咗壽星女食飯嘛~~ :) 生日快樂啦! sorry成晚好似講我多過講你... 我認我可能將件事諗得複雜咗/難咗﹐但係咁做我覺得係對自己一種保護﹐呢個世界人人都自私﹐你唔顧自己就無人會保護你﹐我寧願做最壞打算﹐到時真係有問題都唔會怨... 你明嘛? 其實可能我嘅最壞打算都唔係最壞架啦﹐好多人都話我比較樂觀單純易信人﹐我都只係學緊點做人啫....
講咗成日嘢﹐加上上個星期嘅喉沙﹐我真係要食喉糖啦....
星期三
下午無聊+眼訓﹐去咗隔黎組偷懶... 點知傾傾下比人召返返去﹐但係我返到去佢又走咗.... 結果再去返做阿四﹐哈哈﹐好似真係接咗份阿四工咁添 :P 點都好啦﹐其實我都係揾你攝時間啫... 喺自己個位都係gtalk﹐倒不如見面講﹐哈哈哈! 嗯... 今次個新仔比上兩個差d... 一份小小export﹐只係remove duplicate rows都錯漏百出... 希望遲d會好d啦...
星期四
個個都無心機做嘢﹐返工等coffee break﹐之後等lunch﹐再等去party... 我都係等樓上交功課我先有嘢做..... 有人無錢食飯﹐好慘咁嘅樣﹐哈哈.... 夜晚個party成晚我度係避人... 唔想應酬嘛... 但係成晚就係咁講stalker... 係係係﹐係我揀比人stalk嘅﹐放過我啦好嘛!!!! 仲有果個唔問人permission就影人相嘅VP... 激死!! 之後個的士司機又唔識收聲咁.... 對我黎講唔算係一個好玩嘅party....
星期五
上星期個喉沙都未好﹐尋晚有加多二錢重﹐今日食喉糖多過講嘢 - 做咗"靚坤"..... ><~ 今日都係無乜嘢做﹐係催下老細做多d決定等我走之前交落d嘢比上面做啦.... lunch被迫食返同一樣嘢﹐目的就係有人要還錢 :P 仲有好長嘅gtalk conversation.... 係﹐阿四有樽鹽﹐唔好睇少我唔該!! 我性格如此﹐改咗就唔係我﹐你係都要話人哋stalker我無辦法﹐但係我唔會去無啦啦得罪人囉.... 老實講﹐我真係唔覺得係問題 - 如果你哋唔大做文章嘅話!! 有氣力就留返比你d公事上嘅戰爭啦~! :P
星期六/日
照舊hea.... 不過有媽媽唔洗諗食.... 所以更加hea... 想做resume﹐但係仲等緊份review copy... 想執嘢但係媽未執完佢d野....
睇咗超級特派員﹐好睇呀﹐雖然我唔係temp﹐但係都學都嘢... 佢都係將我哋生活上嘅事放大/誇大嚟做啦﹐令人更易明白返工求生之道... 我仲有排學....
我會盡量update到走為止﹐用果係香港悶都會上黎啦~
No comments:
Post a Comment